- ჯემალ გაბულდანის სახელობის მესტიის მუნიციპალიტეტის სოფელ ბეჩოს სკოლას სრული რეაბილიტაცია ჩაუტარდა.
ახლად რეაბილიტირებული სკოლა საქართველოს განათლების, მეცნიერებისა და ახალგაზრდობის მინისტრის მოადგილე ბაია კვიციანმა გახსნა. მინისტრის მოადგილე განახლებულ ინფრასტრუქტურას გაეცნო და მოსწავლეებსა და მასწავლებლებს შეხვდა.
საქართველოს განათლების, მეცნიერებისა და ახალგაზრდობის სამინისტროს ინფორმაციით, ინფრასტრუქტურული სამუშაოების შედეგად 150 მოსწავლეზე გათვლილ შენობაში მოეწყო ბიბლიოთეკა, სამკითხველო დარბაზი, რესურს ოთახი, ექიმის კაბინეტი, ლაბორატორიები და გარე მოედანი.შენობაში დამონტაჟებულია გათბობის, წყალმომარაგების და კანალიზაციის სისტემები.
სკოლა სრულადაა ადაპტირებული სპეციალური საგანმანათლებლო საჭიროების მქონე მოსწავლეებისთვის.
სკოლის გახსნას ესწრებოდნენ სამეგრელო-ზემო სვანეთის რწმუნებულის მოადგილე ნინო ვიბლიანი, მესტიის მერიის დარგობრივი კურატორი ლევან კიკვიძე და მესტიის რესურს ცენტრის ხელმძღვანელი მარიამ ჯაფარიძე.
სკოლის სრული რეაბილიტაცია მუნიციპალური განვითარების ფონდის მიერ განხორციელდა. პროექტის ჯამური ღირებულება 2 მილიონ 700 ათას ლარამდეა.